រថយន្តមួយគ្រឿងបើកបុកបាក់បង្គោលភ្លើង១ដើម បណ្តាលឲ្យដាច់ចរន្តអគ្គិសនីតំបន់មួយចំនួន ក្នុងខណ្ឌមានជ័យ និងខណ្ឌដង្កោ, ម៉ោង៩យប់ទើបមានចរន្តអគ្គិសនីប្រើប្រាស់ឡើងវិញ

(ភ្នំពេញ)៖ អគ្គិសនីកម្ពុជា បានបញ្ជាក់ឲ្យដឹងថា នៅថ្ងៃទី១៧ ខែវិច្ឆិកា ឆ្នាំ២០១៩ វេលាម៉ោង០៩៖៣៨នាទីព្រឹក មានករណីដាច់ចរន្តអគ្គិសនីពីអនុស្ថានីយទី២ (GS2-F5B&F2B) មូលហេតុមកពីមានរថយន្តបើកបុកបាក់ បង្គោលបណ្តាញតង់ស្យុងមធ្យម (MV) ចំនួន០១ ដើម ដែលបណ្តាលឲ្យដាច់ចរន្តអគ្គិសនីនៅតំបន់មួយចំនួន ដែលស្ថិតនៅ៖ (១) តាមបណ្តោយផ្លូវទំនប់អូស្ត្រាលី ភូមិត្នោតជ្រុំ ភូមិចំរើនផល និងភូមិទំនប់ថ្មី សង្កាត់បឹងទំពុន (២)ភូមិឫស្សី សង្កាត់ស្ទឹងមានជ័យ ខណ្ឌមានជ័យ (៣)ផ្លូវចំការដូង សង្កាត់ដង្កោ ខណ្ឌដង្កោ រាជធានីភ្នំពេញ។ នៅពេលនេះ ក្រុមការងារបច្ចេកទេស កំពុងធ្វើការដាំបង្គោលបណ្ដាញតង់ស្យុងមធ្យម (MV) និងអាចភ្ជាប់ចរន្តជូនអតិថិជនឲ្យមានចរន្តអគ្គិសនីប្រើប្រាស់ឡើងវិញ នៅវេលាម៉ោង ៩:០០នាទីយប់។ អគ្គិសនីកម្ពុជា ក៏សូមអំពាវនាវដល់ប្រជាពលរដ្ឋ ឲ្យមានការប្រុងប្រយ័ត្នខ្ពស់នៅពេលបំពេញការងារ នៅជិតគន្លងខ្សែបណ្ដាញអគ្គិសនី ពីព្រោះអាចបណ្ដាលឲ្យមានការរអាក់រអួលក្នុងការផ្គត់ផ្គង់ចរន្តអគ្គិសនី និងគ្រោះថ្នាក់ជាយថាហេតុ៕